قصيدة زجلية عن حال التعليم

1 1٬735

تْعَالَى تْشُوفْ حَالْ التّعْليمْ

تعالى تشوف حال التعليم
كِيفْ كان فْالقديم
حالو زين مستقيم
أُكِيف صبح اليوم عديم
متقطع بالعطل وسقيم
إلى جِيت تشوف فالقديم
تلقى بنادم قرا بلوحة وطباشير
ستيلو ودفتر صغير
واحفظ فْكتاب الله الكثير
يحترم وِاقدر المعلم تقدير
أما اليوم حال التعليم حَالْ
الكْتُوب كثروا مابقوْ قْلالْ
على ثمانهم لا تبقى شي تْسالْ
سجّل فالورقة تسجيل لمقال
خذ لاَدوات حتى هما عند بْلالْ
اعْزلهم راه ماشي بحال بحالْ
كتوب عبد القادر ومحمد وعلالْ
شرينا لهم كتوب كثيرة
وقواعد اللغة حريرتها حريرة
واش مكلخين ولاعدام لبصيرة
أخوات إن وكان موضرة توضيرة
ما عارفين اسطروا على فاعل
ولا على مفعول تسطيرة
حاتهم تْغَرغَرْ العين تغرغيرة
وتقبض فالحامل الهم الغيرة
واش الحالة دايرة هكذا تدويرة
ولا ولادي اللي مبربرين تبربيرة
دير نظرة لأخلاق الاجدادْ
تلقى تربيتهم وتعليمهم مْقادْ
أما اليوم شوف بنات وولادْ
اللي قلدوا الغرب تقلاد
الولد سروالو طايح مامقادْ
التشويكا فالراس التريكو زادْ
الطربوش العوج عليه قــــــادْ
في ودنيه طانكة بحالو عدادْ
أما حال البنت اكثرْ
عليه لا تبقى شِي تهدرْ
حالها ما بقى لو صبرْ
سروال لاصق و مزيرْ
وجهها صباغة اخضر واحمرْ
مالها على على هاذ لعكرْ
زادتها بتقزيب الشعرْ
واش بهاذ الحالة تتقدم
قلبك همُومُو ســــــالت دمْ
على حالة الولد وبنت العم
كل شي تحسن نوض
يا جاهل تتعلم

تعليق 1
  1. سفيان الدفالي يقول

    تحية عالية للأستاذ ابراهيم بنزاكي على هذه القصيدة الزجلية الرائعة جدا والممتازة، والتي بين من خلالها الحالة التي يعشها قطاع التعليم في هذا العصر، وهي حالة لا يحسد عليها، بل إنها كارثية ولا تبشر بخير.
    ومن هنا أنوى بهذا العمل الجاد الذي شخص حال التعليم في المغرب ولو ما هو ظاهر، رغم أن ما خفي أعظم. ونسأل الله العافية والنجاة من مثل هذه الفتن.
    تحياتي الغالية أستاذي على هذا التعبير الراقي …
    والرسالة واضحة المعاني…

اترك رد

لن يتم نشر عنوان بريدك الإلكتروني.