سلام العاشق
سلام
الله عليكم
ولدكم أنا
غير من هنا
جيتكم بالهنا
سلام
الله عليكم
يا الساكنين ف دواخلي
سلام بريحة الذُّكار
سلام بطعم الجَّمار
لون الزِّيوان اللي ف عيونكم
عطاني الأخبار.
سلام الله عليكم
على ظهر كيسان 1 جيتكم
يا أولاد الأحرار
أولاد بلادي
نعرفهم باللِّيد الحرشة
و التراب ف الاﯕﺪﺍﻡ
القصير فيهم
أطول من النخلة
ما يعرفوا حقد
الكلمة عقد
و الوعد
بقطيع الراس
ما يَتْخان عند الأبرار.
سعدي يانا باللَّمة
البلاد داري
و الوجوه ما غريبة
سعدي يانا
بلادي
النهار فيها حاسد الليل
و الشمس فيها ﺑﺎﻟﯖﻤﺮﺓ تْراري
اﻟﯖﺮﺍﺏ درعة
جاي وحازم الخير للصحاري
أم لولاد الرملة
و لعجاجه نسيبة.
سعدي يانا
البلاد
اللي الشيوخ فيها
جنب ألواد شجر
و النجوم فيها دراري
بعنايتك يا ربي
أحرص زاﯕــــﻮرة
الحبيبة.
عبد العزيز المكي الناصري – باريس في شهر ابريل 2008
1 جبل كيسان: سلسلة جبلية ممتدة من أكدز إلى زاكورة
الله يعطيك العافية